Norsk fjellandskap imponerer mange, og nokre gonger skapar det ekstra spesielle fenomen.
Fjellformasjonar skapar tåkekunst
Stian Aadland, også kjend som Stian med sekken, reiser land og strand for å vere på tur og ta bilete. Denne sommaren var vakre Lofoten ein av destinasjonane på lista.
– Det var ei utruleg oppleving. Vi vart sittande i mange timar å berre stire, fortel Aadland om det spesielle fenomenet.
Biletet tok han ved Ryten over Kvalvika i Lofoten. Det er ikkje tilfeldig at fenomenet oppstår på ein slik stad.
Forsvinn i lause lufta
– Wow, så fint! Slik reagerer statsmeteorolog Justyna Wodziczko i Tromsø når ho får sjå biletet til Aadland.
Sjølv om Wodziczko har sett fenomenet før, var det eit imponerande tydeleg eksemplar Aadland fekk oppleve.
Ho fortel at fotografen fekk sjå ein skyvegg, som oppstår i samband med fønvind. Den blir skapt når fuktig luft blir pressa opp langs fjellkjeda.
– Når ein luftstraum møter ei fjellkjede eller eit fjell, blir den tvungen til å stige. Når lufta stig fell temperaturen i lufta, inntil lufta når sitt mettingspunkt. Då startar vassdampen i lufta å kondensere til vassdropar, og skyer oppstår, forklarer meteorologen.
- Les også: Derfor blir det tåke
På den andre sida av fjellet kjem same luft ned igjen, og blir varma opp på nytt. På biletet ser du at skoddefossen forsvinn når den søkk, og aldri treff bakken.
Det er fordi den møter varm luft, og varm luft kan lagre meir fukt utan av den kondenserer og blir til tåke.
Større og mindre skala
Føneffekten kan oppstå på Austlandet ved vestleg vind. Då blir lufta pressa over Langfjella, og gi varm vind austover. Det same kan skje på Vestlandet, dersom vinden er austleg.
Fenomenet som oppstod i Lofoten, var i ein mykje mindre skala. Men ikkje mindre imponerande.
– Det må ikkje ei stor fjellkjede til før føneffekten oppstår. I Lofoten finst mange lokale høgdedrag der effekten også oppstår, forklarer Justyna.
Lofoten ligg heilt ute ved havet, og får difor den kalde og fuktige havlufta inn når det er vestavêr. Det kan vere med å forsterke føneffekta, og gi dei spektakulære tåkeformasjonane.